ålgнаωаѕ βlоg

عدنا من جديد ^_^

في الفترة اللي طافت كنت انا و 3 من الشباب في رحلة خليجية سريعة  لمدة اسبوع  مرينا فيها على البحرين و الكويت و قطر - بالسيارة طبعا - بصراحة الرحلة كانت وناسة مع الشباب .. ما قصروا يزاهم الله خير .. هاي نبذه عن الرحلة باختصار

في البداية لازم نعرفكم بطاقم الرحلة .. خالد و عبد العزيز و علي و انا .. اتحركنا يوم الثلاثاء الظحى مرينا عالشباب و حركنا صوب الحدود  طبعا اول شي كان لازم نعين ( أمير للرحلة ) يعني مثل الليدر  و ( مسؤول مالي ) عشان يمسك الميزانية و ما يلعب بالفلوس .. و بتصويت الشباب .. خالد كان الأمير و انا طلعت  المسؤول المالي >> محد قالكم تبلشون عمركم فيني 

المووهيم .. صح انه خالد كان أمير الرحلة .. بس بعد كان الدريول طوول الرحلة  .. ما قصر صراحة .. محد ساق عنه طوول الخط  .. بس انا  اكتشفت شي في خالد ..  عطه ايبود + مكسرات + كرك .. و هو بيودييك وييين ما تبا  ، حتى ما فيه داعي تسولف وياه .. خله بروحه بيستاانس

هالحادث شفناه و احنا في الدرب .. الله يعوض عليهم

وقفنا عشان نصلي و نعبي بترول في المحطه

اول شي رحنا البحرين  ، لانه حسب ما سمعنا انها تكون زحمه في الويكند فقررنا انه نروحلها قبل ما نروح الكويت .. وصلنا البحرين بالسلامة .. اول شي خذنا لفة عالبحرين  .. بصراحة كلنا كنا حاطين في بالنا ان البحرين صغيره و عبارة عن 4 دوارات و بس  و بنلفها كلها في ساعتين .. بس يوم وصلنا تغيرت فكرتنا عنها .. يعني كانت اكبر من ما كنا متخيلين .. الموهيم بعد ما لفينا في البحرين و رحنا نتعشى في مول السيف .. و بعدها رحنا ندور لنا شقة فندقية عشان السكن >> طبعا كنا رايحين على ويوهنا ولا مرتبين سكن ولا شي..  بس الحمد لله .. حصلنا شقة غرفتين و صالة بسعر واايد مناسب .. دخلنا الشقة و حطينا الاغراض و تسبحنا و لعبنا سوني و رقدنا

نشينا اليوم اللي بعده .. سوينا check out  و رحنا نتريق في السيتي سنتر  .. و بعدها حركنا للكويت ، عالخط سوالف و اناشيد و مكسرات و كرك و  تشبيك من عند ” علي ” و الامور طيبه يعني مشى الحال

صورة الشباب ..مسيتييت في الكابرس ^^”

وصنا الكويت و اول ما دخلنا صب مطر >> ما شاء الله علينا مطروحة فينا البركة و كالعادة .. لازم نحاوط في المدينة .. اول شي رحنا المارينا مول و كان فيه معرض سيايير كلاسيك و ألعاب نارية مادري شو سالفتهم الموهيم .. خذنا كم لفة في المول و طلعنا ندور مطعم عشان نتعشى .. انزيين .. بعد هالتعب كله الشباب يبون عشى محترم .. خاصة انهم من طلعنا ما كلوا عدل .. ما علينا .. انا اقترحت مطعم فلافل >> يحاتي الميزانية .. لكن شويه تهزيئ من عبدالعزيز كان كافي انه نغير راينا و نروح نتعشى في ” أبل بييز ” >> أهم شي ما يزعل علينا عزوز

عقب العشا تلاقينا مع عمر و أحمد .. سلمنا عليهم و بعدها رحنا ندور سكن .. بعد لف و دورنا حصلنا مكان جيد نوعا ما .. و بتنا فيه و على طووول الكل رقد من التعب

في اليوم اللي بعده نشينا الفجر .. صلينا و كملنا رقاد إلا خالد راح يصلح شي في السيارة و غسلها و رجع  >> جي الأمير و لا بلاش

نشينا عالظهر .. جمعنا الظهر و العصر و رحنا نتعشى في ( فريج صويلح ) بافتراح من اخونا عبدالعزيز  - مسؤول المطاعم و ملاح الرحلة ” نفقيشن ” - خلصنا غدا و تلاقينا مع الشباب أحمد و عمر .. و رحنا نتمشى عالكورنيش … بصراحة كورنشيهم عجييب و يفتح النفس ^^

بعدها رحنا المركز العلمي .. دشينا الأكواريوم و المعرض العلمي

اطفال اجانب .. كانوا يسولفون مع السمج

بعد الجوله في المركز .. لازم كوفي يعدل المزاج

منظر لكورنيش الكويت عند الغروب - تصوير المبدع عبدالعزيز

صلينا المغرب و العشا و رحنا ( الأفنيوز ) عشان نتعشى ويااالله عاد كيف كان زحمة .. ويكند و الشعب كللله في المول ..  اول شي رحوا الشباب يطلعون ارقام .. و بعدها تعشينا و بعدين رحنا نحلي في (شوكليت بار ) .. يا هو عذاااب هالمحل …  ردينا السكن و لعبنا سوني و رقدنا

الشباب راحوا يطلعون ارقام و انا حصلت نت .. دخلت اطمن على زوار مدونتي الأعزاء >> من كثرهم عاد

نشينا اليوم اللي بعده و كان يوم الجمعة .. اتجهزنا للصلاه و صلينا في المسجد الكبير  و بعدها رحنا نتغدى في مطعم ( ميس الغانم )  خلصنا و رحنا أبراج الكويت و صعدنا فوق و يلسنا شوي نشوف الكويت من فوق ..

صورة جماعية مع الكابرس مقابل ابراج الكويت

داخل البرج ..

بعدها ردينا السكن نريح و نهزئ بعض الناس في السوني .. يا العصر .. رحنا سوق المباركية نتسوق .. بعدها رحنا نتعشى في سوق شرق .. و ردينا في فندق و كملنا لعب سوني و رقدنا  -__-”

نشينا من الصبح و تريقنا و حركنا لـ ( قطر ) .. كالعادة .. اول شي نسويه الأكل .. على طول رحنا سيتي سنتر و تغدينا في ( ناندوز ) و بعدها تلافينا مع بن عمي (سالم ) و رحنا كرك النعيمي اللي ذالنا عليه عزوز من اول ما طلعنا و جررربنا كرك النعيمي .. بصراحة كرك غاااوي و اييب الراس >> يستاهل كل هالدعايا

رحنا السكن - بيت خال عزوز - و اتسبحنا بهااك الماي الثلج و صحصحنا و رحنا مول ” فيلاجيو ” عشان نتعشى

صورة تحت القبة اللي تسوي صدى

ما شاء الله .. يكون صداقات مع كل حد

يا وييلي انا

تعشينا من ” فرايديز ” و ردينا البيت و رقااااد ..  في اليوم الأخير .. نشينا من الصبح .. تريقنا في سوق وااقف ..

لواازم التشبييك

و بعدها قبظنا الخط و رديينا البلاد

في النهاية .. نشكر الشباب على الرحلة الطيبة ..

نشكر عبدالعزيز على الصور

نشكر علي .. فاكهة الرحلة ..

و نشكر خالد ( أمير الرحلة ) على القيادة الرشيدة ^^