بسم الله الرحمن الرحيم ..
قبل كل شي .. هالتدوينة هي في المرتبه الاولى لي انا .. حبيت اكتبها لنفسي عشان ما انسى تفاصيل السفرة .. فاللي ما يحب الكلام و التفاصيل المملة .. ما انصحه يكمل قراية الموضوع 
ملاحظة .. قريبا راح تنزل التغطية الرسمية للملتقى من قروب انشادكم الرياض .. ترقبوها 
ان شاء الله بحط لكم رابط التغطية أول ما تنزل ^_^
السفرة كانت موفقة جدا .. و اكثر من رائعة .. تشرفت بمرافقة اخوي محمد راشد النقبي .. - يزاه الله ألف خير انه تحملني لين اخر الرحلة 
.. تلاقينا فيها مع اشخاص كنا نسمع عنهم او نشوفهم في التلفزيون .. و تعرفنا عليهم و سولفنا معاهم .. حقيقة تشرفنا بمعرفتهم
عني انا .. حققت الهدف اللي كنت ساير عشانه 
>> عن اللقافة .. لا تسئلون شو هو
انزين .. نبدا من البداية ..
طبعا بما اني ساكن في أبوظبي .. و محمد ساكن في خور فكان .. فكان من الانسب لنا انه نسافر من مطار الشارجة - حل وسط يعني - تمت الحجوزات على طيران العربية .. الطيارة كانت الساعة 5 يعني لازم نكون في المطار الساعة 3 عالاقل عشان اجراءات السفر ..
تلاقينا في في الشارجة عالساعة 2 .. وقفنا سياييرنا بيت نسيبي .. تغدينا و رحنا المطار .. خلصنا الاجراءات و تمينا نتريا الطيارة .. وصلت الطيارة عالموعد الحمد لله .. و من ركبنا .. مادري بالدنيا الا وحنا واصلين الرياض >> خذت غفوة مال ساعتين بس 
الموهييم و صلنا هناك .. و استقبلنا في المطار اخواننا .. المنشد مشاري الجعفر و المنشد عماد الظفر - و ربي هالثنين حفففله .. من تيلس وياهم ما تبا سوالفهم تخلص - في البداية رحنا السكن اللي كانوا مجهزينه لنا شباب الرياض يزاهم الله خير .. نزلنا الشنط و الاغراض و طلعنا مرة ثانية معاهم .. اول شي خذونا في لفة عالرياض .. و بعدها رحنا شارع التحلية عشان نتعشى .. و بعد لفة و دوران في شارع التحلية .. اخترنا مطعم و نزلنا نتعشى .. و هني تلاقينا مع المصمم المبدع .. خالد البرق
بعد العشا تمشينا شوي في شارع التحلية لانه الجو كان فناان .. و رحنا نيلس في كوفي عشان نحلي .. يلسنا في الكوفي نسولف .. و مر الوقت بسرعة .. خلصنا من الكوفي و رجعنا السكن .. و رقدنا لين اليوم اللي بعده.
في اليوم الي بعده اللي هو يوم الملتقى .. محمد موعنا من الساعة 8 ! شو عنده ها من صباح الله خير 
… الموهيم .. ظغطت على عمري و نشييت .. اول شي رحنا الدوبي - المغسلة - عشان نكوي ملابسنا و بعدين تريقنا و بعدها يلسنا نجهز لفقرتنا في الملتقى .. اخترنا الفقرات اللي بنسويها .و رتبنا امورنا .. كتبنا الاحتياجات اللي ناقصه و تمينا في السكن لين بعد الظهر .. نزلنا نتغدى في المطاعم اللي تحت .. و ريحنا لين العصر 
نشينا نتجهز للملتقى قبل العصر .. و بعد العصر مر علينا اخونا طارق - أحد المنظمين للملتقى - ودانا عشان ناخذ الاحتياجات اللي ناقصه .. و بعدها رحنا لمكان الملتقى .. وصلنا هناك الساعة 5 العصر تقريبا .. فترة العصر كانت فترة استقبال و تعارف بين الشباب .. إلى المغرب .. بعد المغرب كان فيه دورة بعنوان - لمحات في تطوير الذات - من إلقاء الاستاذ عبدالعزيز الخنين .. إلى صلاة العشاء .. و بعد الصلاة بدا الحفل الإنشادي ..
تنوعت المشاركات في الحفل بين مشاركات اللايف .. و مشاركات البلاي باك (-1) - يعني التوزيع و الكورال بدون صوت المنشد الرئيسي ( الصولو ) .. أستمعنا للكثر من المنشدين و المواهب الانشادية الصاعدة .. و طبعا ما ننسى الايقاعيين .. فرقة السعد و فرقة الروضه اللي اشعلوا الحفل و ربشوا جميييع الحاظرين .. الكبير قبل الصغير ^_^ ..
تخلل الحفل كلمة لممثل مؤسسة العين للانتاج الفني .. و كلمة قروب ” غيرني ” التطوعي .. و فقرة مسابقات من إعداد قروب الإمارات - إحنا يعني - .. و بعدها تعشينا .. و بعد العشى كملنا الفقرات الانشادية إلى الساعة 3 بعد منتصف الليل ^_^
بعد هاليوم الحافل .. ردينا السكن مع الثنائي المرح ..المنشد عماد الظفر و المنشد مشاري الجعفر .. و رقدنا
اليوم الأخير .. نشينا و جهزنا أغراضنا للعودة إلى أرض الوطن .. مر علينا المنشد ” محمد العمري “ على اساس نتغدنا و نروح المطار مباشرة .. بس لضيق الوقت و تجنبا للزحمة في المطار .. قررنا انه نروح المطار و نتغدى هناك .. رحنا المطار و حطينا الاغراض في الشحن و رحنا نتغدى .. و مر الوقت و حان موعد الطيران .. ودعنا المنشد ( محمد العمري ) و رحنا نركب الطيارة .. و كالعادة .. من ركبت الطيارة .. خذت لي غفوة مال ساعتين >> مادري شو المخدر اللي يحطونه عالكراسي
من ايلس اسطل و ارقد 
.. و ماادريت الا وانا في مطار الشارجة
و الحمد لله عالسلامة
اولاً الحمدلله على السلامة و شكلها كانت رحلة موفقة على كل المقاييس .. و كانت فرصة حلوة لك و لغيرك للتعارف مع المواهب الاخرى الي نفسك
و لكن ابدي تحفظي عن السهر حتى ” الساعة 3 بعد منتصف الليل ”
((وراك باجر مدرسة))
…
خلني اكون ملقوف و اخمن هدف الرحلة
: هدفك يا سالم في ها الرحلة انك تلاقي المنشد ” محمد العمري ” و تيلس وياه
تحياتي
اهلا أحمد ..
الله يسلمك الغالي .. بس عن اللقافة الزايدة
كلامك صح .. و هذا كان واحد من الأهداف و الحمد لله تحقق ..
صح اني يلست وياه تقريبا 4 ساعات متواصله سولفت و دردشت و نشدت و ما خليت شي في خاطري .. .. بس والله كان ودنا نيلس معاه اكثر .. بصراحة انسان جددددا راقي في تعامله مع الناس و على مستوى عالي من الاخلاق .. و بصراحة ما قصر معانا .. مع انه كان فيه يلسه لشباب الرياض .. إلا انه ما راح لهم .. و جلس معانا و وصلنا المطار و تم معانا لين ما ركبنا الطيارة ..
فيه الخير و الله
الحمدلله على السلامة أخوي سالم ..
أكيد كانت تجربة ثرية ومفيدة لك ..
لا تنسى تحط لنا رابط التغطية ..
وننتظر جديدك على أحر من الجمر ..
بويعقوب كان هنا
مرحبا اخوي بو يعقوب .. منور المدونة ^^
فالك طيب .. اول ما تنزل التغطيه بتشوف الرابط هني و في الفيس بوك و في القروب بعد
حاظريين للطيبين
شكرا على مرورك
أحلى شي كانت الدورة صح؟ خخخخ <<< و مب لازم تجاوب عشان ما تحرج
تفاصيل مملة , و مادري شو الفايدة منها, لا للقارئ أو الكاتب. بس لافايدة تون فقط للملقوف من النوعين
أهم شي حققت هدفك , و اهم شي الاهداف
أهلا خالد .. منور المدونة
الدورة كانت جيدة نوعا ما .. عالاقل قدرت اجلس لين نهايتها > جرررررح
تفاصيل مملة للقارئ .. مممكن .. اما للكاتب ابدا .. الرحلة هاي مهمة بالنسبة لي .. و ما اريد انسى اي شي صار هناك ..
و لهذا السبب انا كاتب بالخط الأحمر في اول التدوينة .. انها شخصية و تخصني انا .. فاللي بيرد نفس ردك .. ما كان لازم يقرا التدوينة من الاساس
شكرا على مرورك ..
وصلنا متأخرين أحسن من ان ما نوصل
مب على أساس انك ما بتنزل شي في المدونة قايل خخخ
المهم شي جميل انك تدون ومثل ما قلت هي لك في النهاية وبترد لها عقب سنة وسنتين وتشوف الكتابة ويكون لها طعم ثاني وذكريات أجمل
من السفرة واضح انها كانت جميلة وموفقة والاهم انها مرتبة وجدولها كان حافل بالفعاليات واللقاءات والأشخاص المميزين
تستاهلون والله واهم شي ((الفايدة والمتعة … في مزيج)) < <<< حاول تذكر وين مر عليك هالشعار ، ولو ما عرفت شوف بدر
شغلة ثانية علقت عندي وما رضت تدخل نفوخي
حفل "إنشادي" ٍإسلامي لين الساعة 3 الفير
ما اقول الا عاااااشوا
ولازم نملّغ عليك شوي عزيزي سالم وحياك اخوي الحبيب ^^
بوذيــــاب
الحمد لله عالسلامة
اهم شي انك وصلت
هههههههه الفايدة و المتعة في مزيج >> قدييييم والله
امم .. بس توضيح بخصوص الشغلة اللي ما طاعت تدخل نفوخك
ترا مثل ما قلت انه الحفل الانشادي بدا من بعد العشا .. و كان مفتوح للمنشدين و المواهب الانشادية .. و لتنظيم هالفقرة كان المنظمين قد طلبوا من اي حد حاب يشارك انه يسجل اسمه و يطرش التوزيع .. من باب تنظيم المشاركات ..
و لكنهم اتفاجئوا وقت الحفل بعدد كبير يبون يشاركون و ما سجلوا اسمائهم في القائمة .. و طبعا ما يبون يزعلون حد .. فالكل نشد .. و الموضوع خذ أكثر من الوفت المحتسب له ..
بالنسبه لنا نحن ما كان عندنا مانع .. يالسييين مستانسين و على قولتك .. عاااشوا عاشوا …. و نحن بعد عشنا الجو
شاكر لك مرورك
بس الحمد لله على السلامة